CEMÛt CA NAS UNE PERAULE FURLANE -  MOTÂRS

Cualche volte si domandisi cui e cemût che al à dât vite a alc che prime nol jere. Al vâl ancje pes peraulis gnovis, che no simpri a àn di jessi inglesisims, anzit. Ûs conti cemût che e je nassude la peraule “Motârs”, intune ostarie dal Friûl culinâr, une sere di un cuart di secul indaûr.
Al jere Avrîl dal 1986, cuant che un trop di zovins amîs motocicliscj furlans “a american vie” (si jere definîts cussì ta chê volte) a volevin fondâ un gnûf club e creâ un gnûf steme di meti sui lôr gjilè di moto. Il club che a jerin daûr a molâ si clamave Free Eagles, la sede dai incuintris e jere la ostarie di Sant Liseu a Maian. Ta chest gjenar di club si voleve ri-formâ, simbui e nons plui di mode tal nord Europe e in Americhe a jerin menaçôs e agressîfs e no vevin il consens di ducj i presints ta chê enesime riunion dal vinars di sere te gnove sede: il bar “Le Vecchie Carceri” di Sant Denêl. I presints, di oris e di dîs, a cirivin di gnûf un non e un simbul che ju rapresentàs, par jessi identificâts miôr in viaç, massime tal forest, in Gjermanie.
Cun me, a jerin Francesco e Flavio di Cjistierne, Mauro di Sant Tomâs e Michele di Cjistierne (che magari cussì no, nus an lassâts), Claudio e Franco di Susans, Massimo di Codroip, Innocente di Sant Salvadôr, Paolo di Pordenon e infin Jerry di Rivis Darcjan, che, a un biel moment, strac e sustât al salte fûr: “clamìnsi Motârs e che e sedi finide”! Si sin cjalâts in muse e o vin capît che, se cheste peraule par inglês si voltave come “Bikers”, par spagnûl e jere però“Moteros” e par francês “Motards”; il leam al jere e ancje il simbul al jere facil di cjatâ: la aquile, il steme araldic dal nestri Friûl. Nissune ostentazion, severitât o tristerie dentri, ma dome serietât, autonomie e voie di fâ cognossi un moviment Biker seri ancje in Nord Italie: e nascevi i Motârs ma ancje une peraule gnove. Al jere ideâl par cui che al cirive un simbul no banâl ma di caratar, che ju caraterizàs tai viaçs luncs tal forest e tal nord Europe dulà che a vevin une vore di amîs. Al jere gjeniâl te sô semplicitât, al plaseve a ducj e la votazion e fo un piçul plebissît.
Cualchi an dopo (al jere il 1989), la sede si jere trasferide li dal “Biker Bar” di Vilegnove di Sant Denêl e ta chê volte i vin domandât al plevan dal paîs, pre Roman, ancjemò vuê passionât di lenghe furlane, di intercedi cu lis sôs cognossincis (par chest al fo judât ancje di pre Zannier di Cjasesole) par fâ meti dentri la peraule “Motârs” (che fin ta chê volte e mancjave te lenghe furlane corint) tai vocabolaris furlans, e cussì al fo. I miôr vocabolaris de lenghe furlane vuê a identifichin te peraule “Motârs” la definizion di “Motociclist” o miôr “Biker”, nassude tal bar “Le Vecchie Carceri” di Sant Denêl, un vinars di sere dal Avrîl dal 1986, un gnûf vocabul dât fûr dome 25 agns indaûr di un trop di passionâts di motos.
Di chês personis e nassè tal 1987 la Biker Fest, destinade a deventâ il cuart motoradun european par spetacolaritât e impuartance, e tal 1991 la Editrice Custom che ue a publiche 3 rivistis fates in Friûl e distribuidis tis ediculis di dute Italie. Une piçule rivoluzion che e voleve ancje dimostrâ une regjon difarente, moderne, indevant in Europe tai soi cjamps di intervent. E dimostrave al mont che “il Friûl nol è dome vilotis”, ma ancje une tiere dinamiche, che e sa stâ al pas cui timps e fasi valè. La fantasie di pôcs motocicliscj e veve creât une piçule inovazion… e po a disin che tal bar no si cumbine nuie di bon! Aromai a son tancj agns che i Bikers o motocicliscj furlans si identifichin te peraule “Motârs” (singolâr “Motâr”) che al è jentrât tal lengaç comun di dut il nestri Friûl.

Vai al menu [M]